Ferðir á næstunni
Viðburður
- Viðburður:
- Hvannadalshnjúkur með FÍ - Ferðir FÍ
- Dagsetning:
- 22.05.2010
Lýsing
Dagsetning: 22.5.2010
Brottfararstaður: Ekið verður á einkabílum austur í Öræfi
Viðburður: Hvannadalshnjúkur með FÍ
Erfiðleikastig:
Lýsing: 22. maí, laugardagur (hvítasunna)
Fararstjóri: Haraldur Örn Ólafsson
Hámarksfjöldi: 80
Árleg ferð á Hvannadalshnjúk (2.110 m) sem hefur notið mikilla vinsælda. Ekið verður á einkabílum austur í Öræfi föstudagskvöldið 21. maí og er gisting að eigin vali. Gengin verður Sandfellsleið og hefst fjallgangan kl. 04:00 við bílastæðið við Sandfell á laugardeginum. Hæðarhækkun er rúmir 2000 metrar og er gert ráð fyrir að gangan taki í heild 12 til 15 klukkustundir. Heitur grillmatur og svaladrykkir bíða við rætur fjallsins.
Helsti útbúnaður: Skór með góðum sóla, mannbroddar, klifurbelti, ísöxi, sólgleraugu, sólaráburður, skjólgóður fatnaður og nesti. Nánari útbúnaðarlisti verður sendur með tölvupósti. Undirbúningsfundur 19. maí kl. 20 í Mörkinni. Skráning og greiðsla fyrir 1. maí.
Þátttaka í dagsferðum FÍ og reglulegar fjallgöngur góður undirbúningur fyrir ferðina. Sjá undirbúningsáætlun FÍ fyrir ferðina á heimasíðu FÍ.
Verð kr. 12.000 / 15.000 án gistingar og búnaðar.
Búnaður fæst leigður hjá FÍ. Takmarkað magn.
Innifalið í verði: Fararstjórn, grill og svaladrykkir eftir göngu.
Sjáðu tindinn, þarna fór ég!
Hvannadalshnúkur er óumdeilt landsins hæsti tindur og ekki stendur til að breyta þeirri stöðu hans þótt sífellt nákvæmari mælingar undanfarin ár hafi leitt í ljós ofurlítið lægri tölu en þá sem þjóðin lærði í barnaskóla. Í vitund þjóðarinnar er tindurinn 2119 metrar yfir sjávarmál og það skal látið standa þótt nýlegar GPS mælingar séu nær 2111 metrum.
Ferðafélag Íslands hefur undanfarin ár staðið fyrir göngum á Hvannadalshnúk um hvítasunnu og leiðangrar þessir hafa notið sívaxandi vinsælda og hvert ár skipta þeir hundruðum sem sigrast á landsins hæsta fjalli og sjálfum sér um leið.Allir sem komast á tindinn eru sigurvegarar og Ferðafélagið er stolt af því að hafa átt þátt í þeirri miklu fjölgun sem orðið hefur í hópi Hvannadalshnúksfara undanfarin ár og hyggst halda því starfi áfram af fullum krafti.
Undanfarin ár hefur Haraldur Ólafsson leitt leiðangra Ferðafélagsins á Hvannadalshnúk og hefur það átt sinn þátt í vinsældunum.
Varla þarf að kynna Harald nánar en hann er víðförlasti og magnaðasti fjallamaður sem Ísland hefur átt. Enginn Íslendingur hefur leikið afrek Haraldar eftir en ungur að árum hefur hann komið báða pólana, klifið hæsta tind hverrar heimsálfu, farið þvert yfir Grænlandsjökul svo fátt eitt sé nefnt meðal afreka hans.
Haraldur er nátengdur Ferðafélagi Íslands nefndur í höfuðið á afa sínum Haraldi Matthíassyni menntaskólakennara á Laugarvatni sem skrifaði margar árbækur FÍ og lagði drjúgan skerf af mörkum við könnun leiða á hálendi Íslands og brautryðjendastarf á sviði ferðamennsku. Haraldur er sonur Ólafs Arnar Haraldssonar, forseta Ferðafélags Íslands.
Ferðatilhögun er að vanda þannig að menn koma á eigin bílum í Skaftafell eða Öræfasveit en gangan hefst við bílastæðið við Sandfell kl. 04.00 að morgni laugardags. Þaðan lestar hópurinn sig upp Sandfellsheiði og ganga menn lausir í fyrstu en við jökulrönd í um 1000 metra hæð er honum skipt í 10-12 manna hópa sem ganga eftir það bundnir saman í línu í klifurbeltum og þarf hver maður að hafa ísöxi og mannbrodda með í farangri sínum.
Fremstur í hverri línu fer fararstjóri frá Ferðafélaginu en allir lúta þeir leiðsögn Haraldar sem er aðalfararstjóri leiðangursins. Með þessu er hámarksöryggi hópsins tryggt og nýjasta tækni í staðsetningum og fjarskiptum notuð til að tryggja greiða leið hópsins upp á brún öskju Öræfajökuls í um 1800 metra hæð.
Síðan liggur leiðin þvert yfir öskjuna til norðurs eftir sléttri snjóbreiðu fyrir austan sprungusveim Virkisjökuls sem fellur fram úr öskjunni. Á þessum slóðum mun jökullinn vera um 500 metra þykkur niður á öskjubotn. Í norðurbarmi öskjunnar rís svo Hvannadalshnúkur og er nokkuð bratt upp á hnúkinn sjálfan og þar reynir oftast á notkun brodda og axar og þátttakendur læra margt um notkun þessara mikilvægu öryggistækja.
Ganga á Hvannadalshnúk
22. maí 2010
Ferðatilhögun:
Reiknað er með að gengið verði á Hnúkinn á laugardag. Þátttakendur verða að fylgjast með heimasíðu FÍ til hádegis á föstudag þar sem fréttir birtast af endanlegum uppgöngutíma. Einnig verður sendur tölvupóstur á þá sem hafa gefið upp netfang.
Að öllu óbreyttu verður fyrirkomulag ferðarinnar svona: Þátttakendur koma sér sjálfir austur í Öræfi á föstudag á einkabílum. Mælt er með að leggja af stað úr bænum ekki seinna en kl. 17:00 þar sem aksturinn tekur um fimm tíma og mikilvægt er að hvílast fyrir uppgönguna. Gisting er í höndum hvers og eins en bent er á að fararstjórar verða í tjöldum í Svínafelli.
Áætlað er að uppgangan hefjist við eyðibýlið Sandfelli á þeim tíma sem tilkynntur verður í hádeginu á föstudeginum. Gengið veður Sandfellsleið. Hæðarhækkunin er um 2000 metrar og má gera ráð fyrir að gangan taki í heild 14 klukkustundir (upp og niður).
Góð ráð:
Hvíla skal í viku fyrir gönguna, borða og sofa vel. Best er að reyna að halda stressinu í lágmarki til að geta sofið vel og verið vel upplagður. Mikilvægt er að drekka vel af vatni áður en lagt er af stað í gönguna. Einnig er mikilvægt að borða og drekka í öllum stoppum til að viðhalda orkubúskapnum. Þá er mikilvægt að bera á sig sólaráburð reglulega allan daginn og nota sólgleraugu. Gott er að setja íþrótta-plástur (sports-tape) á hæla fyrir gönguna til að forðast hælsæri. Mikilvægt er að vera ekki of mikið klæddur, eitthvað sem flestir flaska á. Ekki hafa of mikið af fötum í bakpokanum, þau eru ótrúlega þung og maður þarf ekki á þeim að halda. Galdurinn er að hafa bara það sem maður þarf - óttinn við skortinn er mjög sterkur hjá mörgum. Þetta á líka við um mat, ekki hafa allt of mikið. Við munum ganga á mjög jöfnum og rólegum hraða en það skilar bestum árangri. Mikilvægt er að vera ekki of æstur í göngunni í byrjun, það fara margir flatt á því. Þetta er langur dagur og mikilvægt að púls og öndun fari aldrei mikið upp. Á móti kemur að við munum stoppa sjaldan og stutt. Mikilvægt að nýta stoppin vel til að gera allt sem þarf að gera, borða, drekka, pissa, setja á sig plástur og bera á sig sóláburð. Klassísk mistök eru svona: Mikið stress fyrir ferð og í upphafi ferðar, ekkert sofið og lítið borðað, lítið drukkuð um morgun út af stressi, pokinn þungur, of mikið klædd/klæddur, mikill sviti, hár hjartsláttur og hröð öndun, gengið of hratt í byrjun, lítið borðað og drukkið út af stressi, í miðri ferð er þjáningin orðin mikil og ánægjan að göngunni á hraðri niðurleið. Þetta er allt hægt að forðast með góðum undirbúningi.
Öryggismál:
Mikil áhersla er lögð á að tryggja hámarks öryggi í ferðinni. Farið verður yfir öryggismál á undirbúningsfundi og við upphaf ferðar. Mikilvægt er að þátttakendur taki vel eftir þessum atriðum og fari eftir leiðbeiningum fararstjóra. Fjallgöngur fela ávallt í sér áhættu og eru þátttakendur á eigin ábyrgð í ferðinni.
Drykkir og nesti:
Drykkir 2 til 3 lítrar. Mælt er með einum lítra af heitu, t.d. kakó eða te. Aðrir drykkir geta t.d. verið orkudrykkur eða ávaxtasafi.
Nesti getur t.d. verið fjórar flatkökur með hangikjöti, einn kexpakki og súkkulaðistykki.
Útbúnaður fyrir gönguna:
Vandaðir gönguskór með góðum sóla.
Bakpoki (35 til 45 lítrar)
Mannbroddar
Klifurbelti og læst karabína
Ísöxi (gönguöxi, ca. 60-70 cm.)
Sólgleraugu og skíðagleraugu
Sóláburður og varasalvi
Jakki og buxur úr vindheldu öndunarefni
Flíspeysa, göngubuxur og síð nærföt
Aukaflíspeysa eða létt dúnúlpa
Húfa, vettlingar og göngusokkar
Legghlífar
Göngustafir
Myndavél
Hælsærisplástur
EventList powered by schlu.net
