Gönguklúbbur stofnaður í Skagafirði
Gönguklúbbur var nýlega stofnaður í Skagafirði. Forsprakkar klúbbsins, þær Rósa María Vésteinsdóttir og Ásdís Guðmundsdóttir segja að klúbburinn sé öllum opinn, jafnt vönum göngugörpum sem og tilvonandi göngugörpum.
Í héraðsblaðinu Feyki kemur fram að þær stöllur hafi oft rætt saman um þær frábæru gönguleiðir sem eru í Skagafirði og hversu leiðinlegt það er að hafa ekki getað nýtt sér þær meira sökum skorts á ferðalögum og þekkingar á staðháttum.
Eftir að hafa gert smá könnun meðal vina og ættingja voru 25 manns komnir á blað og var ákveðið að stofna gönguhóp fyrir áhugamenn um fjallamennsku og útivist. 16 manns mættu á stofnfund og stofnuð var þriggja manna nefnd til að halda utan um dagskrá hópsins og koma henni á framfæri.
Markmið félagsins er að koma saman fólki sem hefur áhuga á útivist og hreyfingu og ganga saman.