Farið verður í skipulagða fjallgönguferð upp á Óshyrnu á laugardag, en það er eitt af þeim fjöllum sem er að finna í „Sigraðu sjálfan þig“ í fjallapassanum svokallaða. Er fjallgangan hluti að þeim hreyfitilboðum sem eru í boði í tengslum við verkefnið Hreyfing fyrir alla og leikinn Fjallapassann sem Heilsuefling í Ísafjarðarbæ sér um að skipuleggja. Leiðsögumaður verður Harpa Grímsdóttir hjá Snjóflóðasetrinu.

Laugardaginn 6. september er svo áætlað að fara á Sauratinda sem eru fyrir ofan Súðavík og laugardaginn 13. september verður farið á Kaldbak sem er hæsti tindur Vestfjarða. „Þessar gönguleiðir eru fyrir alla þá er eru í þokkalegu líkamlegu ásigkomulagi og eru væntanlegir göngugarpar minntir á að klæðast eftir veðri og að taka með sér nesti“, segir í tilkynningu.

Skráning þátttöku fer fram hjá Upplýsingamiðstöð ferðamála, í síma 4508060 og er þátttökugjald í gönguferðina 800 kr. sem greiðist við brottför. Rútu ferðir verða frá Ísafirði, Flateyri, Suðureyri, Þingeyri, Súðavík, Bolungarvík – ef næg þátttaka fæst. Lagt verður af stað frá Ísafirði kl. 12 en nánari tímasetning á brottför frá hverjum stað er gefin við þátttökuskráninguna.

Nánari upplýsingar um gönguleiðirnar er að finna í Sigraðu sjálfan þig fjallapassanum og á vefsíðunni www.fjallapassinn.is.