Ferðir á næstunni

Námskeið fyrir fólk sem vill kynnast heimi bakpokaferða og fræðast um búnað og fatnað sem þarf til þess að ferðast frjáls eins og fuglinn með allan mat og búnað í einum bakpoka.
Námskeiðið fer fram í sal Ferðafélagsins í Mörkinni 6.

Mánudaginn 12. apríl frá kl. 20-22

Farið gegnum tilhögun bakpokaferða og vandlega gegnum allan búnað sem þarf;  svefnpoka, tjald, bakpoka, fatnað, skó og allt annað sem nauðsynlegt er að vita. Þetta er gert með sýningum á búnaði, myndasýningum, dreifingu lista yfir búnað og nánari útskýringum.

Þriðjudaginn 13. apríl frá kl. 20-22

Fjallað um nesti í bakpokaferðum, matargerð á fjöllum og skoðaður búnaður til þess s.s. prímusar bæði fyrir bensín og gas og farið í gegnum kosti og galla hvorttveggja. Matarlistum dreift meðal þátttakenda og bent á nokkrar hentugar matartegundir.

Helgina 17-18 apríl.

Gengið með allan búnað á bakinu stutta dagleið einhvers staðar í nágrenni Reykjavíkur, tjaldað um kvöldið, eldað og sofið. Daginn eftir er gengið svipaða eða sömu leið til baka að bílum. Þarna verður æft og prófað allt sem fjallað var um bóklega á kvöldnámskeiðinu. Áfangastaður nánar auglýstur síðar.

Leiðbeinendur og fararstjórar: Páll Ásgeir Ásgeirsson og Rósa Sigrún Jónsdóttir

Verð: 10.000/15.000

Innifalið í verði: námskeið, námsgögn, kennsla og leiðsögn í vettvangsferð

Að ferðast með allt á bakinu veitir ferðamanni alveg sérstaka frelsistilfinningu sem enginn annar ferðamáti býr yfir. Bakpokaferðalangur lætur nótt sem nemur og slær tjöldum sínum þegar honum finnst nóg gengið og er óbundinn af öðru en sínu eigin úthaldi og útbúnaði.
En til þess að ferðalagið verði ánægjulegt þarf tvennt að vera í sæmilegu lagi. Annars vegar þarf sá sem undir pokanum gengur að vera í nógu góðu formi til þess að ferðin verði honum ekki of erfið. Hins vegar þarf hann að vera rétt útbúinn. Ekki er gott að rogast með of þungan búnað, of mikið af einhverju eða eitthvað sem engin þörf er á. Enn verra er þegar eitthvað nauðsynlegt vantar í búnaðinn.
Þetta námskeið er tilraun til þess að kynna þennan dásamlega ferðamáta. Eins og sést af lýsingunni verður reynt að fara í sem flest grundvallaratriði um búnað og ferðir með þessum hætti. Námskeiðinu lýkur svo með stuttri gönguferð þar sem verður látið reyna á búnað og þátttakendur.
Páll Ásgeir og Rósa Sigrún hafa ferðast um Ísland með allt á bakinu í tvo áratugi og gera enn þegar færi gefst. Þau eru meðal ötulustu fararstjóra Ferðafélags Íslands um þessar mundir og fara með fólk um Hornstrandir, Fjallabak og víðar.