Ferðafélagið efnir til göngu á Kvígindisfell (783 m) sunnudaginn 21. september. Lagt verður af stað frá Mörkinni 6 kl. 10.30. Kvígindisfell er á mörkum Árnessýslu og Borgarfjarðarsýslu, nálægt Uxahryggjaleið, um klukkustundar akstur frá Reykjavík.

Mjög víðsýnt er af fjallinu, en til þessa hefur ekki verið ýkja tíðförult á það. Í hittiðfyrra lauk Ferðafélagið stikun gönguleiðar á Kvígindisfell og á næstu dögum setur félagið upp upplýsingaskilti um fjallið og útsýni af því við uppgöngustað í Víðikerum (rétt hjá eldri Uxahryggjavegi sem haldið verður opnum í framtíðinni). Ganga á Kvígindisfell telst fremur létt. Hækkun frá uppgöngustað er 443 m.

Bent skal á lýsingu á gönguleiðinni á Kvígindisfell (ásamt korti af leiðinni) í riti Leifs Þorsteinssonar, Gönguleiðir upp úr botni Hvalfjarðar (s. 49), sem gefið var út 2007 í ritröðinni Fræðslurit Ferðafélags Íslands (rit nr. 14).

Fararstjóri í göngunni er Ingi Sigurðsson.

Farið er á einkabílum en þátttakendur safnast saman í bíla fyrir brottför.

Þátttaka er ókeypis, allir velkomnir.

Menningar- og sögutengd gönguferð sunnudaginn 7. september kl. 11. Mæting er við SBK hjá Duushúsum í Keflavík.

Ekið verður með rútu að Melabergi og gengið þaðan gömlu þjóðleiðina frá Hvalsnesi til Keflavíkur. Hluti leiðarinnar, vetrarleiðin, er vel varðaður en nú á að rekja elsta hluta götunnar, sumarleiðina, sem er enn vel mörkuð í landslagið. Leiðin býr yfir mögnuðum sögum og fróðleik sem Sigrún Jónsdóttir Franklín mun miðla á leiðinni.

Hvalsnesvegur er á kafla innan varnargirðingar og hefur því ekki verið aðgengilegur í langan tíma.

Áætlað er að gangan taki  ca. 3 - 4 klst. með stoppum. Þátttöku- og rútugjald kr. 1500. Frítt fyrir börn. Gott er að hafa með sér nesti og vera í góðum skóm. Allir eru á eigin ábyrgð.

Gangan er síðasti hluti af menningar- og sögutengdum gönguferðum um gamlar þjóðleiðir á Reykjanesskaganum sem farnar hafa verið á tímabilinu frá 1.ágúst – 7.sept.

Þátttakendur hafa safnað stimplum fyrir ferð í hverju sveitarfélagi á þátttökuseðil og þeir sem hafa farið 3 - 6 þjóðleiðir getra verið með í potti sem dregið verður úr í Hvalsnesgöngunni. Þrír vinningar í boði frá Cintamani og Bláa Lóninu.

Allir eru velkomnir í Hvalsnesgöngu.