Hættu að hanga!
Nýr vefur ganga.is tekinn í notkun
Nýr og uppfærður vefur að ganga.is hefur verið tekinn í notkun. Nýi vefurinn hefur að geyma mun meiri og ýtarlegri upplýsingar um gönguleiðir vítt og breitt um landið. Nýtt göngukort er á síðunni auk þess sem hægt er á fá upplýsingar um veður.
Á heimasíðunni ganga.is er að finna upplýsingar um 800 gönguleiðir á Íslandi ásamt áhugaverðum fróðleik fyrir göngu- og útivistarfólk.
Í verkefnisstjórn Göngum um Ísland eru Ásdís Helga Bjarnadóttir, UMSB/stjórn UMFÍ, Einar Jón Geirsson, UDN/stjórn UMFÍ, Alda Þrastardóttir, Ferðamálastofu, og Ómar Bragi Stefánsson, landsfulltrúi UMFÍ.
Þá er vert að geta um verkefnið Göngum um Ísland sem er landsverkefni UMFÍ. Verkefnið er unnið í samstarfi við ungmennafélög um land allt, ferðaþjónustuaðila og sveitarfélög. Ísland hefur að geyma mikinn fjölda gönguleiða og hafa nú verið valdar útvaldar gönguleiðir í hverju byggðarlagi. Ný leiðabók með tæplega 300 gönguleiðum liggur frammi á sölustöðvum Olís um allt land. Í Leiðabókinni Göngum um Ísland er lögð áhersla á stuttar, stikaðar og aðgengilegar gönguleiðir.
Fjölskyldan á fjallið er einn liður í verkefninu. Settir hafa verið upp póstkassar með gestabókum á 20 fjöllum víðsvegar um landið, en öll þessi fjöll eiga það sameiginlegt að vera tiltölulega létt að ganga á. Markmiðið er að fá fjölskyldur í létta fjallgönguferð og stuðla þannig að aukinni samveru, útivist og um leið líkamsrækt innan fjölskyldunnar.
Mynd: Frá opnun nýja vefsins en frá frá vinstri eru Sæmundur Runólfsson, framkvæmdastjóri UMFÍ, Helga Guðrún Guðjónsdóttir, formaður UMFÍ, Trausti Dagsson frá Teikn á lofti, og Halldór Jóhannsson framkvæmdastjóri Teikn á lofti.